काठमाडौं उपत्यकाको फोहरपानी व्यवस्थापनका लागि चार ठाउँमा फोहरपानी प्रशोधन केन्द्र निर्माण भइरहेको छ । तीमध्ये एउटा सञ्चालनमा आइसकेको र तीन वटा निर्माणको चरणमा रहेको आयोजना कार्यान्वयन निर्देशनालयले जनाएको छ ।

निर्देशनालयका अनुसार गुहेश्वरीमा फोहरपानी प्रशोधन केन्द्रको निर्माण सम्पन्न भएर सञ्चालनमा आएको छ । बालकुमारी (कोड्कु), सल्लाघारी र धोबीखोलामा फोहरपानी प्रशोधन केन्द्र निर्माणाधीन अवस्थामा रहेको छ । तीन चरणमा निर्माण अघि बढाइएकामा पहिलो चरणअन्तर्गत गुहेश्वरीमा गत कात्तिकमा सम्पन्न भएको थियो भने बाँकी दुई चरणको काम भइरहेको सूचना अधिकारी जगत प्रजापतिले बताए ।

उनका अनुसार दोस्रो चरणअन्तर्गत सल्लाघारी र बालकुमारीमा काम अघि बढाइएको छ । धोबीघाटमा दुई ट्याङ्की निर्माण हुनेमा फरकफरक प्याकेजमा काम भइरहेको उनले जानकारी दिए । उनले भने, ‘धोबीघाटमा एउटा अरू दुई स्थानसँगै एउटै प्याकेजमा निर्माण भएको छ भने एउटा छट्टै निर्माण भइरहेको छ ।’

गत आवमा निर्माणमा विश्वव्यापीरुपमा फैलिएको कोभिड–१९ प्रभाव परेको थियो भने अझै पनि काम गर्नै वातावरण सहज नभएको निर्देशनालयले जनाएको छ । निर्माणाधीन यी फोहोरपानी प्रशोधन केन्द्रमा संलग्न अन्तर्राष्ट्रिय निर्माण कम्पनीका जनशक्ति कोभिडका कारण नियमितरुपमा काम नगरेको सूचना अधिकारी प्रजापतिले बताए ।
उनका अनुसार कोभिडको खोप लगाउन स्वदेश गएका चिनियाँहरु अझै फर्किएर आएका छैनन् । सल्लाघारी, बालकुमारी र धोबीघाट गरी तीनै स्थानमा निर्माणका लागि आवश्यक उपकरण ल्याउन नसकिएको उनको भनाइ छ । धोबीघाटस्थित केन्द्र निर्माणमा केही वर्षपहिले स्थानीयवासीको विरोध भएकामा निर्देशनालयले ललितपुर महानगरपालिकासँगको समन्वयमा त्यसको समाधान गरेर निर्माण अघि बढाएको हो । दोस्रो र तेस्रो चरणको भौतिक प्रगति अहिलेसम्म २८ प्रतिशत छ । दोस्रो चरणमा ट्याङ्की निर्माणको काम भइरहेको छ ।

उपत्यकामा मेलम्ची खानेपानी आयोजना आएपछि फोहोरपानीको मात्रा बढ्ने भन्दै सरकारले यी केन्द्र चाँडो सम्पन्न गर्ने लक्ष्य लिएको छ । गुहेश्वरीस्थित केन्द्र सञ्चालनमा आए पनि यहाँको सुन्दरता निर्माण र पार्क निर्माणलगायतका काम भइरहेको छ ।

दुई वर्षअघि निर्माण थालिएको प्रशोधन केन्द्रको निर्माण तोकिएको अवधिभन्दा एक वर्षपछि सम्पन्न भएको थियो । सरकारले काठमाडौँ उपत्यकाका नदीहरुमा फोहोरपानीको ढल सिधै मिसिन नदिन प्रशोधन केन्द्र निर्माण गरिरहेको हो । प्रशोधन केन्द्रबाट बायो ग्याससँगै विद्युत समेत निकाल्ने योजना बनाइएको छ ।
 

निर्मल (एसपी) थापा

लेखकबाट थप

• मंगलवार, पौष २८ २०७७०८:१३:२६

• देवदहमा लायन्स क्लब अफ देवदह प्रोफेशनल युथको आयोजनामा ‘पिस पोस्टर कन्टेस्ट’

• एनप्याब्सन रुपन्देहीद्वारा शिक्षकलाई एआई र आईसीटीमा आधारित नवीन शिक्षण पद्धतिबारे तालिम

• दुबईमा अक्टोबर ४ मा नेपथ्यको भव्य लाइभ कन्सर्ट हुने

• मगर महिला संघको स्थापना दिवस : सशक्तिकरण र नेतृत्व विकासमा जोड

• संविधान दिवस तथा राष्ट्रिय दिवसमा दुबईमा झण्डोत्तोलन, शहीदप्रति सम्मान