मंगलवार, आश्विन १३ गते २०८३
मंगलवार, आश्विन १३ गते २०८३
इटहरी।इटहरी उपमहानगरपालिकाका मेयर द्वारिकलाल चौधरीले नगरवासीलाई नियमविपरीत कार्यालयमा थुनेको भन्दै नेपाली कांग्रेस इटहरीले उपमहानगरपालिका घेराउ गरेको छ । बुधबार साँझ मेयर चौधरीको कार्यकक्षमा तालाबन्दी गरेको नेपाली कांग्रेसले स्थानीय नेता, कार्यकर्ताहरुसहित बिहीबार बिहानै उपमहानगरपालिका घेराउ गरेको हो ।
बुधबार दिउँसो इटहरी ४ आइतबारेका यामप्रसाद ढकाललाई प्रमुख प्रशासकीय अधिकृतको कार्यकक्षमा थुनेर मेयर चौधरी हिँडेको र साँझ इटहरी प्रहरीले उनको उद्धार गरेको कांग्रेसको आरोप छ ।
.jpeg)
ढकालले ऐलानी जग्गा मिचेर घर बनाएको र नक्सा पाससमेत नगरेको भन्दै मेयर चौधरीले बुधबार दिउँसो कार्यालयमा बोलाएका थिए । सो क्रममा चौधरीले सात दिनभित्र भत्काउने लिखित गर्न भनेको तर आफूले नमानेको ढकालले बताए ।
‘मैले नमानेपछि थुन्देऊ भनेर मेयरले नगर प्रहरीलाई अह्राउनुभयो र थुनेर हिँड्नुभयो,’ उनले भने । ढकालले आफूलाई दुई घण्टादेखि थुनिएको विषयमा जानकारी गराएपछि नेपाली कांग्रेस नगरसभापति हेमकर्ण पौडेललगायतको समूह उपमहानगरपालिका पुगेको थियो । पछि प्रहरीको सहयोगमा उनलाई निकालिएको हो।
यता मेयर चौधरीले भने आफूले बस्दै गर्नु भनेको तर नथुनेको बताएका छन् । बोलाएको समयमा नआएपछि आफू बाहिर निस्कदै गर्दा आएका ढकाललाई कार्यालयमा बस्दै गर्नु भनेको उनले जिकिर गरेका छन् ।
यता नेपाली कांग्रेसले भने मेयर चौधरीको गतिविधि नगरवासीको हितविपरीत भएको भन्दै सशक्त प्रतिरोध गर्ने जनाएको छ । यसअघि मंगलबार मात्रै पनि उनले इटहरी १३ मा निर्माणाधिन रिसोर्टको पर्खाल भत्काएका थिए ।
Copyright © All right reserved to Lumbini Pana Site By: Sobij
