मंगलवार, आश्विन १३ गते २०८३
मंगलवार, आश्विन १३ गते २०८३
लुम्बिनी पाना, देवदह । "स्वस्थ शरीर, स्वस्थ मन, सुखी जीवनको आधार – योग अपनाऔँ, जीवन सुसज्जित बनाऔँ" भन्ने मूल नाराका साथ रुपन्देहीको देवदहमा १२ औँ अन्तर्राष्ट्रिय योग दिवस भव्य रूपमा सम्पन्न भएको छ।
देवदह नगरपालिका वडा नं. ५ को आयोजना तथा बुद्ध सामुदायिक वन उपभोक्ता समिति, खेमा योगा क्लास, वडा नम्बर ५ का टोल विकास संस्था र जीवन विज्ञान देवदहको सहजीकरणमा देवदह खैरैनीस्थित पानबारी खेलमैदानमा सो विशेष योग कार्यक्रम सम्पन्न भएको हो
.jpeg)
बिहान ५:०० बजेदेखि ७ बजेसम्म सञ्चालन भएको उक्त योग सत्रमा अन्तर्राष्ट्रिय योग गुरु टेक माया गुरुङ र जीवन विज्ञानका केन्द्रीय सदस्य एवं योग प्रशिक्षक दुर्गा बहादुर क्षेत्रीले सहभागीहरूलाई विशेष प्रशिक्षण दिनुभएको थियो। प्रशिक्षणका क्रममा उहाँहरूले स्वस्थ जीवनका लागि प्राणायाम, आसन र ध्यानको महत्त्वबारे प्रयोगात्मक अभ्यास गराउनुभएको थियो।
खानपिन अव्यवस्थित हुँदा स्वास्थ्य जोखिम बढ्यो : प्रमुख अतिथि गुरुङ
कार्यक्रमकी प्रमुख अतिथि देवदह नगरपालिकाका उपप्रमुख विद्यालक्ष्मी गुरुङले पछिल्लो समय मानिसहरूको खानपिन र जीवनशैली अव्यवस्थित हुँदै जाँदा विभिन्न खालका स्वास्थ्य जोखिमहरू बढ्दै गएको प्रति चिन्ता व्यक्त गर्नुभयो। उहाँले नगरवासीहरूलाई सचेत गराउँदै भन्नुभयो, "स्वास्थ्य शरीर भए मात्र हाम्रा हरेक सपना र लक्ष्य साकार हुन मद्दत पुग्दछ, त्यसैले योगलाई दैनिक जीवनको हिस्सा बनाउन जरुरी छ।"
देवदह नगरपालिका वडा नं. ५ का वडा अध्यक्ष गणेश डुम्रेको अध्यक्षतामा सम्पन्न भएको उक्त कार्यक्रममा बोल्दै अध्यक्ष डुम्रेले समाज र नगरको समग्र समृद्धिका लागि भौतिक पूर्वाधारको विकास मात्र पर्याप्त नहुने धारणा राख्नुभयो। उहाँले भौतिक विकास सङ्गै मानवीय विकास र नागरिकको मानसिक तथा शारीरिक स्वास्थ्य बढी महत्त्वपूर्ण र दिगो हुने कुरामा जोड दिनुभयो।
कार्यक्रममा स्थानीय जनप्रतिनिधि, सामुदायिक वन, विभिन्न संघसंस्थाका प्रतिनिधि, टोल विकास समितिका पदाधिकारीहरुको उपस्थिति रहेको थियो।
Copyright © All right reserved to Lumbini Pana Site By: Sobij
