सोमवार, आश्विन १२ गते २०८३
सोमवार, आश्विन १२ गते २०८३
विवेक पौडेल
उ विदेश पस्दा फुकेका
दुई चौबन्दीका फुर्का
.jpeg)
फेरी बाँधिने आशमा पर्खि रहेछन् ।
उ बेला साथी जस्तै रहेको हलोको अनौ,
हली आउने आशमा टोलाइरहेछ ।
न उ चौबन्दी लगाउन आइ
न उ हलो समाउन आयो ।
न देशमा रमाउन आयो ।
न नागरिक हुँ भनि जनाउन आयो ।
अनौ टोलाउँदै रह्यो,
चौबन्दीमा ढोडेसी लाउँदै गयो ॥
हलोमा धमिरो लाउँदै गयो ।
पर्खाइमा बसेको
चौबन्दीको आश मरेर गयो ।
हलोको अनौ सडेर गयो ॥
अनौ र हली टाढिएसँगै,
हलो र खेत टाढिदै गए ।
खेत र बारी बाझिँदै गए ।।
बा बारी को माटो सारो भयो
हलो चलाउन गार्हो भयो
ट्याक्टर किनिदेउ भन्छ छोरा ।
बा भरे भरे भन्छन्
फेरि सम्झाउन खोज्छ
कति कराउँछ हरे भन्छन् ।
बा ले केहि भन्दैनन् ,
उसका कुरा गन्दै गन्दैनन् ।।
बा सँग रिसाएर
ट्याक्टरको आशमा
हलो छोडेर विदेश गएको उ,
उदो उदो भन्छ ट्याक्टर तल आउदैन ।
उबो जा भन्छ उ माथी जादैन ।
मान्दैनस् भन्छ, ट्याक्टर केही बोल्दैन ।
मुख त खोल्दै खोल्दैन ।
अझै मान्दैनस भन्छ, टायरमा हान्छ ।
ट्याक्टर अगाडी बढ्दैन ।
जती पिटे पनी अघि सर्दैन ।।
अरे कस्ले भनिदिने त्यो ट्याक्टर हो,
कुनै माले हैन । तारे गोरु हैन ।।
उता ट्याक्टर चलाउन नजान्दा,
हात फालीले खायो।
यता खेत बनमाराले खायो ।
उता उसले ट्याक्टर चलाउन खोज्दै छ
यता देशले उसलाई खोज्दै छ
पासपोट सँग
विदेशीको परिचय किनेको उसले
देशमै विदेशी बनेर घाइते बनेर आउदा,
न ट्याक्टर पाउछ ।
न आमाको अनुहारमा खुशी देख्न पाउछ ।
न खेतले हली पाउछ ।।
हिजो उ गयो, आज त्यो जादैछ ।
देश बृद्ध आश्रम बन्दैछ ।।
दिनहु हजारौं सपना टुट्दै , साथ छुट्दैछन् ।।
ट्याक्टरको आशा विदेशिने त्यसलाई,
कस्ले भनिदिने ?
फालीले हात खाएका कुरा,
विदेशमा दुख पाएका कुरा,
सपना टुटेका कुरा ,
देश सँग सम्बन्ध फुटेका कुरा,
हिजो उ
नेपाल आमाको छातीमा टेकेर विदेश पस्दा
धेरैको सम्बन्ध टुटे, चौबन्दीका सपना टुटे,
अनौ र हलीको सम्बन्ध टुट्यो
हलो र खेतको साथ छुट्यो
त्यसैले सिप सिक
सुविधा सम्पन्न हुन बा लाई फकाउ,
त्यो ट्याक्टर देशमै चलाउ,
हलो सँगको सम्बन्ध कायम गराउ,
चौबन्दी र अनौका सपना साकार बनाउ,
देशमै जुट युवा देश बनाउ ।
देश बचाउ। देशमै रमाउ ।
Copyright © All right reserved to Lumbini Pana Site By: Sobij
